Isa 30 | NdeIBE | STEP | “Maye ebantwaneni abalobuqholo,” kutsho uJehova, “kulabo abafeza amacebo angasiwami, abenza isivumelwano, kodwa kungengoMoya wami, besengeza isono phezu kwesono;

Isaiah 30

Maye esizweni esiyisiqholo

1 “Maye ebantwaneni abalobuqholo,” kutsho uJehova, “kulabo abafeza amacebo angasiwami, abenza isivumelwano, kodwa kungengoMoya wami, besengeza isono phezu kwesono;

2 labaya eGibhithe bengabuzanga kimi; abadinga usizo lokuvikelwa nguFaro, lomthunzi wokuphephela eGibhithe.

3 Kodwa-ke ukuvikelwa nguFaro kuzakuba lihlazo kini, umthunzi weGibhithe uzaliyangisa.

4 Lanxa belabameli eZowani, lezithunywa zabo sezifikile eHanesi,

5 bonke bazayangeka ngenxa yabantu abangalasizo kubo, Abangalethi sizo loba inzuzo, kodwa ihlazo lokuyangeka kuphela.”

6 Isiqalekiso mayelana lezinyamazana zeNegebi sithi: kulo lonke ilizwe lobunzima losizi, elezilwane lezilwanekazi, elamabululu lezinyoka ezeqayo izithunywa zithwala inotho yazo ngemihlane yabobabhemi, impahla yazo eligugu ziyithwale ngamalunda amakamela, zikusa ebantwini abangayikuba losizo kuzo.

7 Zisiwa eGibhithe osizo lwayo lungelamsebenzi. Ngakho ngiyibiza ngokuthi nguRahabi ivilavoxo.

8 Hamba khathesi nje, ubalobele khona esibhebhedwini, kulobe emqulwini, ukuze kuthi ezinsukwini ezizayo kube yibufakazi obungapheliyo.

9 Laba ngabantu abangabahlamuki, abantwana abangabakhohlisi, abantwana abangafuniyo ukulalela imfundiso kaJehova.

10 Bathi kwabayizanuse, “Lingabe lisahlahlula futhi.” Kubaphrofethi bathi, “Lingasitsheli imibono ngalokho okuqondileyo. Sitsheleni izinto ezinhle, liphrofethe inkohliso.

11 Tshiyani indlela le, phambukani kulo umkhondo liyekele ukuzisisezela ngoNgcwele ka-Israyeli!”

12 Ngakho okutshiwo ngoNgcwele ka-Israyeli yilokhu: “Njengoba lilalile ilizwi leli, lathembela ekucindezelweni, lagwaba ngokukhohliswa,

13 isono lesi kini sizafana lomduli ophakemeyo olomkenke njalo ohlephukayo odilika masinyane, ngesikhatshana nje.

14 Uzadilika ube yizicucu njengembiza ephahazeke kakubi akwaze kwatholakala lesihlephu sokokha amalahle eziko ezicucwini zayo kumbe ukukha amanzi emgqonyeni.”

15 Lokhu yikho okutshiwo nguJehova uNkulunkulu oNgcwele ka-Israyeli, ukuthi: “Ukusindiswa kwenu kusekuphendukeni lekuphumuleni, amandla enu asekuthuleni lekwethembeni, kodwa likwalile lokhu.

16 Lithe, ‘Hatshi, sizabaleka ngamabhiza.’ Ngakho lizabaleka! Lithe, ‘Sizagada amabhiza alejubane.’ Ngakho abalixotshayo bazakuba lejubane!

17 Abayinkulungwane bazabaleka besongelwe ngoyedwa nje; lapho kusonge abahlanu lizabaleka lonke, lize lisale linjengensika yophawu lwelizwe esengqongeni yentaba, lanjengesiboniso phezu koqaqa.”

18 Kodwa uJehova ulangatha ukuba lomusa kini; uyavuka ukuba alitshengise isihawu. Ngoba uJehova unguNkulunkulu wokulunga. Babusisiwe bonke abamlindeleyo!

19 Awu bantu baseZiyoni, abahlala eJerusalema, alisayikulila. UJehova uzakuba lomusa kini nxa licela usizo. Uzaliphendula khonokho nje ekulizweni kwakhe. 20 Lanxa nje uJehova elinika isinkwa sokuhlupheka lamanzi osizi, abalifundisayo kabayikucatsha futhi; lizababona ngamehlo enu. 21 Loba liphambukele kwesokudla kumbe kwesenxele lizalizwa ilizwi ngemuva kwenu lisithi, “Le yiyo indlela; hambani ngayo.” 22 Lapho-ke lizangcolisa izithombe zenu ezihuqwe ngesiliva lezifanekiso zenu ezinanyekwe ngegolide. Lizazilahlela khatshana njengelembu lowesifazana obesesikhathini, lithi kuzo, “Sukani lapha!”

23 UJehova uzalehlisela izulu lenhlanyelo yenu eliyihlanyele emhlabathini, lamabele azavela emhlabathini azakuba mahle njalo emanengi. Ngalolosuku izinkomo zenu zizakudla emadlelweni abanzi. 24 Izinkabi labobabhemi elilima ngakho umhlabathi kuzakudla utshani lamabele achaywe ngefologwe langefotsholo.

25 Ngosuku lokubulawa okukhulu, lapho imiphotshongo isiwa, izifula zamanzi zizageleza kuzo zonke izintaba ezinde lakuwo wonke amaqaqa adephileyo. 26 Inyanga izakhanya njengelanga, ukukhanya kwelanga kukhanye ngokuphindwe kakhombisa, njengokukhanya kwezinsuku eziyisikhombisa ezigcweleyo, lapho uJehova esebopha amanxeba abantu bakhe, epholisa lezilonda ezabangwa nguye.

27 Khangelani, ibizo likaJehova livela khatshana, lolaka oluvuthayo kanye lokuthunqa kwentuthu enkulu; izindebe zakhe zigcwele intukuthelo, ulimi lwakhe lungumlilo ohangulayo.

28 Umoya awuphefumulayo unjengesifula esigcweleyo esilamanzi afika entanyeni. Uhlungula izizwe ngesefa yokubhubhisa; ufaka emihlathini yabantu amatomu abasa ekulahlekeni.

29 Lizahlabela njengasebusuku bokujabulela umkhosi ongcwele; izinhliziyo zenu zizathokoza njengalapho abantu besiya entabeni kaJehova, eDwaleni lika-Israyeli, belemihubhe.

30 UJehova uzakwenza abantu balizwe ilizwi lakhe lobukhosi, njalo uzakwenza bayibone ingalo yakhe isehla ngokuthukuthela okukhulu langomlilo oqothulayo, langesihlambo esikhulu, lomdumo kanye lesiqhotho.

31 Ilizwi likaJehova lizayichitha i-Asiriya; abatshaye ngenduku yakhe yobukhosi.

32 Umvimbo ngamunye uJehova abatshaya wona ngentonga yakhe yokujezisa, uzakuba ukanye lokutshaywa kwamagedla lemihubhe, lapho esilwa labo impi ngezidutshulo zengalo yakhe.

33 IThofethi sekukade yalungiswa, seyenziwa yalungela uJehova. Igodi layo lomlilo selenziwa latshona njalo laba banzi, ngomlilo langenkuni ezinengi umphefumulo kaJehova ulilumathisa njengokugeleza komlilo wesolufa.